Zertaz ari gara arrakala digitalaz ari garenean? Bizitza digitalerako sarbidearen deskonexio partzial edo erabatekoaz ari gara. Deskonexio horren ondorioa da teknologietarako eta Interneterako, eta ondorioz oinarrizko zerbitzuetarako sarbidea duten eta ez duten pertsonen artean sortzen den urruntzea. Interneten hedapenarekin eta garapenarekin mundu digitalean bizi gara. Iraultza teknologikoak eremu pribatua gainditu du, eta aurrerapen teknologikoak eremu publikoetan ere ezarri dira: administrazioan, hezkuntzan, osasunean, oinarrizko zerbitzuetan, etab. Zoritxarrez baina, Interneterako sarbidea ez da unibertsala, eta horrek gizarte-bazterketako baztertze bide berri bat eragin du, arrakala digitala deiturikoa. Pitzadura horrek, hainbat alderditan eragiten du: ezagutzan, herritarren parte-hartzean, hezkuntzan, lan-aukeretan, etab. Aitzitik, konektatzeko modua izanik ere, arrakala digitala ez da desagertzen. Arazoa hori baino sakonagoa da, izan ere, pertsona guztiok konpetentzia digitalak ez ditugu, ez gara iaioak, edo erabilerari loturiko zailtasunak sortzen zaizkigu. Izarkom Eskolaren hamargarren saio honetan, Eider Imaz Izarkom lantaldeko kideak internetaren oinarrizko erabilerarako gakoak emango dizkigu. Saio praktikoa izango denez, hartzaileei smartphone-a ekartzea gomendatzen diegu. IZEN EMATEA: Saioa euskaraz izango da eta mokadutxo bat jateko aukera izango da amaieran. Interesa duenak izena eman dezake presentzialki Bilbora etortzeko (plaza mugatuak) edo online streaming bidez ikusi ahal izateko. Izen ematea beharrezkoa da, eskolari buruzko informazio osagarria jasotzeko edo eta azken orduko beharrizan edo aldaketak jakinarazi ahal izateko.